admin
റേഡിയോ ജോക്കി എന്ന നിലയിലും വ്ളോഗർ എന്ന നിലയിലും സാമൂഹിക നിരീക്ഷകൻ എന്ന നിലയിലും ശ്രദ്ധേയനായ വ്യക്തിത്വമാണ് ആർ ജെ സൂരജ്. കണ്ണൂർ ശ്രീകണ്ഠപുരം സ്വദേശിയായ സൂരജ് റേഡിയോ മാംഗോയിലൂടെയാണ് ആർ ജെയായി തുടക്കമിടുന്നത്. കണ്ണൂർ സ്റ്റേഷനിൽ തന്നെയായിരുന്നു തുടക്കത്തിൽ. പിന്നീട് ഖത്തറിലെ റേഡിയോ മലയാളം എന്ന എഫ് എം സ്റ്റേഷനിലും ജോക്കിയായി കരിയർ തുടർന്നു. സോഷ്യൽ മീഡിയയിലും സജീവമാണ്. ഇപ്പോളിതാ ഭാര്യയുടെ അമ്മയ്ക്ക് പിറന്നാളാശംസ നേർന്നുള്ള സൂരജിന്റെ കുറിപ്പ്ശ്ര ദ്ധേയമായിക്കൊണ്ടിരിക്കുകയാണ്.
കുറിപ്പിങ്ങനെ,
ഞാൻ നല്ല ഭക്ഷണത്തിന്റെ പേരിൽ ദേഷ്യപ്പെട്ടിട്ടുള്ളത്‌ ഈ കോഴിക്കോട്‌ കുറ്റ്യാടിക്കാരിയായ അമ്മയോട്‌ മാത്രമാണ്‌. അക്ഷയയുടെ അമ്മയാണ്‌. കോഴിക്കോടിന്റെ സൽക്കാരപ്രിയം ഏറ്റവും നന്നായി ഞാൻ കണ്ട വ്യക്തികളിലൊരാൾ. ആദ്യമാദ്യം അക്ഷയയുടെ വീട്ടിൽ പോകാൻ എനിക്ക് പേടിയായിരുന്നു കാരണം ഒരു വിരുന്നുകാരൻ വരുന്ന പോലെ ഡൈനിംഗ്‌ ടേബിൾ നിറയെ പലതരം ഭക്ഷണം രാപകലില്ലാതെ അവർ ഉണ്ടാക്കി വെക്കും. അത്‌ കാണുമ്പൊ ഞാൻ ആലോചിക്കുന്നത്‌ എന്റെ അമ്മയെ ആയിരിക്കും. അത്രേം ഫുഡ്‌ ഉണ്ടാക്കാൻ പാവം എത്ര നേരം മെനക്കെട്ടിട്ടുണ്ടാവുമെന്ന്.
ആദ്യത്തെ സൽക്കാരം കഴിഞ്ഞപ്പൊ ഞാൻ കരുതി ഒന്നാം വരവ്‌ ആയത്‌ കൊണ്ടാവും ഇത്രയും ഐറ്റംസ്‌. രണ്ടാമതും മൂന്നാമതും നാലാമതും അങ്ങനെ ഓരോ തവണ ഭാര്യവീട്ടിൽ പോയാലും എല്ലാ നേരത്തും ടേബിൾ നിറഞ്ഞു തന്നെ കാണാൻ തുടങ്ങിയപ്പൊ ഞാൻ ആകെ ടെൻഷനായി. ഞാൻ അങ്ങോട്ടുള്ള പോക്ക് മെല്ലെ കുറച്ചു. അല്ലെങ്കിൽ മരുമകന്റെ വരവിന്റെ പേരിൽ അവർ ലോൺ എടുക്കേണ്ട ലെവലാകുമെന്ന് തോന്നി.
കഴിഞ്ഞ വെക്കേഷൻ സമയത്തെ ആദ്യ പോക്കിലും കലക്കൻ ഭക്ഷണം മുന്നിലുണ്ട്‌. ഫുൾ വാരി തിന്നണമെന്നുമുണ്ട്‌ പക്ഷേ അന്ന് കൊതി മനസിൽ അടക്കി ഏറ്റവും ലൈറ്റായി ഞാൻ കഴിച്ചു. അമ്മക്ക്‌ ഭക്ഷണം ഉണ്ടാക്കുന്നതിനെക്കാൾ ടെൻഷനാണ്‌ ആ ഭക്ഷണം ഞാൻ കഴിച്ചില്ലെങ്കിൽ. പക്ഷേ അന്നു ഞാൻ കാര്യായി കഴിച്ചില്ല.”എല്ലാ, എന്താ കഴിക്കാത്തേ. കറിയൊന്നും ഇഷ്ടായില്ലേ. ഞാൻ തിരക്ക്‌ പിടിച്ച്‌ ഉണ്ടാക്കേനെക്കൊണ്ട്‌ നന്നായിക്കില്ലേമ്മോ.”അമ്മക്ക്‌ ആകെപ്പാടെ ടെൻഷൻ. ടെൻഷനോ ടെൻഷൻ. അപ്പൊ ഞാൻ പഞ്ച്‌ ഡയലോഗടിച്ചു.
“ദയവ്‌ ചെയ്ത്‌ എന്നെ വിരുന്നുകാരനായി കാണുന്നത്‌ നിർത്തുമോ. എനിക്ക് വല്ല ചോറും പുളിങ്കറിയും മതി ഇങ്ങനെ ഭക്ഷണം കഴിക്കാൻ യാതൊരാഗ്രഹവുമില്ല, പ്ലീസ്‌!” സത്യത്തിൽ കഴിക്കാൻ ആഗ്രഹമില്ലാഞ്ഞിട്ടോ സിമ്പിളായതുകൊണ്ടോ അല്ല ഞാൻ ഒരാൾ വീട്ടിൽ വരുന്നതിന്റെ പേരിൽ അവർ കഷ്ടപ്പെടുമല്ലോ എന്നോർത്തിട്ടായിരുന്നു. അതെന്തായാലും ഏറ്റു. പിറ്റേ ദിവസം രാവിലെ സാദാ ദോശേം ചമ്മന്തിയും. ഉച്ചക്ക്‌ സാധാ ചോറും മീൻ പൊരിച്ചതും ഉപ്പേരിയും കറിയും. ആഹഹാ. വിരുന്നുകാരൻ മോഡ്‌ മാറി വീട്ടുകാരൻ മോഡായി. സഹായിച്ചില്ലെങ്കിലും ഒരാളുടെ കഷ്ടപ്പാട്‌ എന്നെക്കൊണ്ട്‌ കുറക്കാൻ സാധിച്ചതിൽ സമാധാനമായി. ആ കോഴിക്കോടൻ സൽക്കാരപ്രിയ അമ്മയുടെ പേര്‌ ഗീതയെന്നാണ്‌. അമ്മയുടെ നല്ല പിറന്നാൾ ദിനമാണ്‌. അമ്മക്ക്‌ സ്നേഹം നിറഞ്ഞ പിറന്നാളാശംസകൾ
