ലൗഡ് സ്പീക്കര് പരിപാടിക്ക് എതിരെ രൂക്ഷ വിമര്ശനവുമായി രംഗത്ത് എത്തിയിരിക്കുകയാണ് നടി എസ്തര് അനില്. വിവാദമായ എസ്തറിന്റെ ഫോട്ടോഷൂട്ട് എന്ന എപ്പിസോഡിന് എതിരെയാണ് താരം രംഗത്ത് എത്തിയിരിക്കുന്നത്. ഇതൊക്കെ കണ്ട് എത്രകാലം താന് മിണ്ടാതിരിക്കണം എന്ന് എസ്തര് തന്റ ഇന്സ്റ്റഗ്രാം സ്റ്റോറിയിലൂടെ ചോദിക്കുന്നു.
പരിപാടിയില് പങ്കെടുത്ത താരങ്ങളെ ടാഗ് ചെയ്തു കൊണ്ടായിരുന്നു താരത്തിന്റെ വിമര്ശനം. ”എന്തുകൊണ്ടെന്ന് അറിയില്ല പ്രതികരിക്കാതിരിക്കാന് ശ്രമിക്കുകയാണ്.. 2 ആഴ്ചയോ? മൂന്ന് ആഴ്ചയോ? സ്നേഹ ശ്രീകുമാര്, കൈരളി ടിവി, ആല്ബി ഫ്രാന്സിസ്, രശ്മി അനില്കുമാര്, നിങ്ങളെല്ലാം വെറും ഷിറ്റ്” ആണെന്നും താരം കുറിച്ചിട്ടുണ്ട്.
അതേസമയം ലൗഡ് സ്പീക്കറിന് എതിരെ സോഷ്യല് മീഡിയയില് വന് വിമര്ശനമാണ് ഉയരുന്നത്. നടി ശ്രിന്ദ അടക്കമുള്ളവര് ഈ പരിപാടിക്കെതിരെ രംഗത്ത് എത്തിയിട്ടുണ്ട്. ഓണ്ലൈന് ആങ്ങളമാരുടെയും സദാചാര കമ്മിറ്റിക്കാരുടെയും ഓഡിറ്റിങ്ങുകളുടെയും അങ്ങേയറ്റം വൃത്തികെട്ടൊരു വേര്ഷന് ഇപ്പൊ കാണുന്നത് ലൗഡ് സ്പീക്കര് എന്ന കൈരളിയുടെ പ്രോഗ്രാമിലാണെന്ന് സിനിമാപ്രവര്ത്തകനായ അമല്രാജ് വി. അഞ്ചല് ഇന്സ്റ്റാഗ്രാമിലൂടെ പ്രതികരിച്ചത്.
ഇത് 2021 ആണെന്ന് ഓര്മ്മിപ്പിക്കുന്നു. ഈ വൃത്തികേട് ഇനിയും ഓടില്ല. എല്ലാവരും ടോക്സിക് സ്വഭാവ ശീലങ്ങളും കാഴ്ചപ്പാടുകളുമെല്ലാം മറക്കാന് ശ്രമിക്കുകയും സ്ത്രീ അവകാശങ്ങള്ക്കായി പൊരുതുമ്പോള്, സ്വന്തം ശരീരത്തെ സ്നേഹിക്കാന് എല്ലാവര്ക്കും സാധിക്കുന്നൊരു ഇടത്തിനായി പ്രവര്ത്തിക്കുമ്പോള്, സങ്കടകരമെന്ന് പറയാമല്ലോ, ഇവിടെ നമ്മള് 20000 ചുവട് പിന്നിലേക്ക് പോവുകയാണ് എന്നാണ് ശ്രിന്ദ കുറിച്ചത്.