സാരി ഉടുക്കരുത്, ലിപ്സ്റ്റിക്ക് ഇടരുത്, അഭിനയം നിർത്തണം, തന്നെ പെണ്ണു കാണാൻ വന്നയാളുടെ ഡിമാന്റ് വിശദീകരിച്ച് നടി സുചിത്ര

വാനമ്പാടി എന്ന സീരിയലിലൂടെ പ്രേക്ഷക ശ്രദ്ധ നേടിയ നടിയാണ് സുചിത്ര നായര്‍. അതിന് ശേഷം പ്രേക്ഷകര്‍ നടിയെ ഏറ്റവും അടുത്തറിഞ്ഞത് ബിഗ്ഗ് ബോസ് ഷോയിലൂടെയായിരുന്നു. ബിഗ്ഗ് ബോസിന് ശേഷം സുചിത്രയുടെ വിവാഹത്തെ കുറിച്ച് പല തരത്തിലുള്ള കഥകളും വന്നിട്ടുണ്ട്.

ഇപ്പോഴിതാ തന്നെ പെണ്ണു കാണാന്‍ വന്ന ആളുകള്‍ പറഞ്ഞ പല പല ഡിമാന്റുകളെ കുറിച്ചും മുന്‍പൊരു അഭിമുഖത്തില്‍ സുചിത്ര പറഞ്ഞ കാര്യങ്ങള്‍ വൈറലാവുന്നു. ആനീസ് കിച്ചണ്‍ എന്ന ഷോയില്‍ വന്നപ്പോഴാണ് പെണ്ണു കാണാന്‍ വരുന്നവര്‍ പറയുന്ന ഡിമാന്റുകളെ കുറിച്ച് സുചിത്ര പറഞ്ഞത്.

കല്യാണ ആലോചനകള്‍ ഒന്നും നടക്കുന്നില്ലേ എന്ന് ചോദിച്ചപ്പോള്‍, എന്തിനാണ് ഒരാളുടെ ജീവിതം (കല്യാണം കഴിക്കുന്ന ആളിന്റെ) ജീവിതം നശിപ്പിയ്ക്കുന്നത് എന്നായിരുന്നു സുചിത്രയുടെ ആദ്യ പ്രതികരണം. പക്ഷെ സീരിയസ് ആയിട്ട് പറഞ്ഞാല്‍ അതല്ല കാരണം എന്ന് പിന്നീട് സുചിത്ര വിശദീകരിച്ചു.

എനിക്ക് വരുന്ന ആലോചനകള്‍ പലതും, പെണ്ണു കാണാന്‍ വന്ന് കല്യാണം ഏകദേശം ഉറച്ചു, അവരുടേതായി എന്ന് തോന്നിയാല്‍ പിന്നീട് ഡിമാന്റുകള്‍ വയ്ക്കാന്‍ തുടങ്ങും. ഡാന്‍സ് കളിക്കുന്നത് നിര്‍ത്തണം, അഭിനയിക്കുന്നത് നിര്‍ത്തണം എന്നൊക്കെയാണ് ഒരു കൂട്ടര്‍ പറഞ്ഞത്. അഭിനയം വേണമെങ്കില്‍ നിര്‍ത്താം, ഡാന്‍സും നിര്‍ത്തണം എന്ന് പറഞ്ഞാല്‍ എനിക്ക് അത് അംഗീകരിക്കാന്‍ കഴിയാത്തതാണ്.

ഡാന്‍സുമായി ഇറങ്ങി നടക്കുന്ന ഒരു പെണ്ണിനെ എനിക്ക് വേണ്ട, വീട്ടില്‍ അമ്മയെയും അച്ഛനെയും കുടുംബവും എന്ന് ചിന്തിയ്ക്കുന്ന പെണ്ണിനെ മതി എന്നൊക്കെയായിരുന്നു അയാളുടെ ഡിമാന്റ്. പിന്നെ ഒരാള്‍ വന്നിട്ട് ചോദിയ്ക്കുകയാണ്, ഈ ഡാന്‍സ് ഫീല്‍ഡിലും സിനിമ ഫീല്‍ഡിലും എല്ലാം ഏതെങ്കിലും ഒരാളുടെ കുടുംബം നന്നായിട്ട് പോകുന്നുണ്ടോ എന്ന്.

അപ്പോള്‍ ഞാന്‍ ചോദിച്ചു, ഇതിലൊന്നും പെടാത്ത ആള്‍ക്കാര്‍ ഡൈവോഴ്സ് ആവുന്നില്ലേ എന്ന്.വേറെ ഒരാളുടെ ഡിമാന്റ് ആണ് വളരെ വിചിത്രമായി തോന്നിയത്. ഞാനല്ലാതെ മറ്റൊരാള്‍ നിന്നെ ഇഷ്ടപ്പെടുന്നത് എനിക്ക് ഇഷ്ടമല്ല. അതുകൊണ്ട് നീ കണ്ണ് എഴുതരുത് കണ്ണ് എല്ലാവരും ശ്രദ്ധിയ്ക്കും, ലിപ്സ്റ്റിക് ഇടരുത് ചുണ്ട് എല്ലാവരും ശ്രദ്ധിയ്ക്കും, മുടി അഴിച്ചിടരുത് മുടി എല്ലാവരും ശ്രദ്ധിയ്ക്കും സാരി ഉടുക്കരുത് ശരീരം എല്ലാവരും ശ്രദ്ധിയ്ക്കും എന്നൊക്കെ.

പക്ഷെ വാനമ്പാടി സീരിയലില്‍ എന്റെ അമ്മയായി അഭിനയിച്ച പ്രിയ ചേച്ചി പറഞ്ഞിട്ടുണ്ട്, ഇങ്ങനെയൊക്കെയായിരുന്നു മോളെ എന്റെ കാര്യവും എന്ന്. ‘ഭര്‍ത്താവ് ഒന്നിനും വിടില്ല എന്ന് പറഞ്ഞാണ് കല്യാണം കഴിച്ചത്. പക്ഷെ പിന്നീട് എന്നെ മനസ്സിലാക്ക് എന്റെ സ്വപ്നങ്ങളെ കുറിച്ച് അറിഞ്ഞ് എന്നെ വിട്ടു’ എന്ന്. പക്ഷെ എപ്പോഴാണ് ചേച്ചിയുടെ ഭര്‍ത്താവ് വിട്ടത്, കുട്ടികളൊക്കെ ആയി അവരൊക്കെ സെറ്റില്‍ഡ് ആയതിന് ശേഷം. അതുവരെ ഒന്നും എനിക്ക് എന്റെ ഡാന്‍സ് വിട്ടു നില്‍ക്കാന്‍ പറ്റില്ല- സുചിത്ര കൂട്ടിച്ചേര്‍ത്തു.