admin 
മഴവിൽ മനോരമയിൽ സംപ്രേഷണം ചെയ്തിരുന്ന ‘നായികാ നായകൻ’ റിയാലിറ്റി ഷോയിലൂടെ ജനശ്രദ്ധ നേടിയ നടിയും നർത്തകിയുമായ മാളവിക കൃഷ്ണദാസും നടൻ തേജസും വിവാഹിതരായി. എറണാകുളം എളമക്കര ഭാസ്കരീയം കൺവെൻഷൻ സെന്ററിൽ വച്ചായിരുന്നു വിവാഹം.
മിനിസ്ക്രീനിലെയും ബിഗ്‌സ്‌ക്രീനിലെയും ഒട്ടേറെ പേർ ചടങ്ങിൽ പങ്കെടുത്തു. റിയാലിറ്റി ഷോയിലൂടെ കണ്ടുമുട്ടിയ ഇരുവരും സൗഹൃദത്തിൽ ആവുകയായിരുന്നു. സോഷ്യൽ മീഡിയയിൽ സജീവമായ ഇരുവരും തങ്ങളുടെ വിശേഷങ്ങൾ ആരാധകരുമായി പങ്കുവയ്ക്കാറുണ്ടായിരുന്നു. ഇപ്പോഴിതാ ഇരുവരുടെയും വിവാഹത്തിൻറെ ഫോട്ടോകളും വീഡിയോകളും സമൂഹമാധ്യമങ്ങളിൽ വൈറലാവുകയാണ്.
കഴിഞ്ഞ വർഷം ഡിസംബറിൽ ആയിരുന്നു ഇരുവരും വിവാഹിതരാകുന്നുവെന്ന വിവരം മാളവിക തന്റെ സോഷ്യൽ മീഡിയയിലൂടെ അറിയിച്ചത്. എന്നാൽ തങ്ങളുടെത് പ്രണയവിവാഹം അല്ലെന്നും രണ്ടു പേരുടെയും വീട്ടുകാർ തീരുമാനിച്ച കല്ല്യാണമാണ് ഇതെന്നും ഇരുവരും സോഷ്യൽ മീഡിയയിലൂടെ പറഞ്ഞിരുന്നു. നായികാ നായകനിലെ പ്രേമം റൗണ്ട് ആണ് തങ്ങൾ ആദ്യമായി ഒന്നിച്ച് ചെയ്തതെന്നും അവിടെ നിന്നും ഇപ്പോൾ ഇവിടെ വരെ തങ്ങൾ എത്തിനിൽക്കുന്നുവെന്നും ഇരുവരും പറഞ്ഞിരുന്നു.
ലോക്ഡൗൺ സമയത്താണ് ഈ വിവാഹാലോചന വരുന്നതെന്നും അന്ന് തനിക്ക് ഇരുപത്തിയൊന്ന് വയസ്സായിരുന്നു എന്നും മാളവിക പറഞ്ഞിരുന്നു. ഇപ്പോൾ അത് വിവാഹം വരെ എത്തിയെന്നാണ് പെണ്ണുകാണൽ ചടങ്ങുമായി ബന്ധപ്പെട്ടു പങ്കുവെച്ച വീഡിയോയിലൂടെ പറഞ്ഞിരുന്നത്.
‘നായികാ നായകൻ’ ഷോ കഴിഞ്ഞ് ‘തട്ടിൻപുറത്ത് അച്യുതൻ’ എന്ന സിനിമയിൽ അഭിനയിച്ചതിന് ശേഷം താൻ ഷിപ്പിലേക്ക് തിരിച്ചുപോയിരുന്നു. അതിനിടെയാണ് തനിക്ക് കല്യാണാലോചനകൾ വന്നു തുടങ്ങിയതിന്നാണ് തേജസ് പറഞ്ഞിരുന്നത്. തനിക്ക് മാളവികയെ നന്നായി അറിയാമായിരുന്നെന്നും റിലേഷൻഷിപ്പിൽ ആയിരുന്നില്ലെന്നും തേജസ് പറഞ്ഞിരുന്നു. എന്നാൽ അറിയാവുന്ന ആളെ വിവാഹം കഴിച്ചാൽ നന്നായിരിക്കുമെന്ന് തോന്നിയതിനാലാണ് മാളവികയുടെ അടുത്ത് വിവാഹാലോചനയുമായി വന്നതെന്നും തേജസ് വ്യക്തമാക്കിയിരുന്നു.
