amrutha 
ഏഷ്യാനെറ്റ് സംപ്രേഷണം ചെയ്ത ബംഗ്ലാവ് ഹിറ്റ് ഷോയിലൂടെ പ്രേക്ഷകർക്കു പ്രിയങ്കരിയായ താരമാണ് ആര്യ ബാബു. ചാനലിലൂടെയും റിയാലിറ്റികളിലൂടെയും നിരവധി തവണ പ്രേക്ഷകരുടെ ഇഷ്ടം ആര്യ സ്വന്തമാക്കി. ബിഗ് ബോസിലെ മത്സരാർത്ഥി കൂടിയായിരുന്നു. അതിനിടയ്ക്ക് താരം ബിസിനസ് രംഗത്തും തന്റേതായ കഴിവ് തെളിയിച്ചിരുന്നു. ഇപ്പോഴിതാ കാക്കനാട് പ്രവർത്തിക്കുന്ന താരത്തിന്റെ ബിസിനസ് സ്ഥാപനത്തിൻറെ ഒഫീഷ്യൽ ഫോൺ നമ്പറിലേക്ക് വിളിച്ച് അശ്ലീലം പറഞ്ഞയാളെ തുറന്നുകാട്ടി നടി ആര്യ സമൂഹമാധ്യമത്തിൽ എത്തിയിരിക്കുകയാണ്. ഇയാളുമായുള്ള ഫോണ്‍ സംഭാഷണത്തിന്റെ വിഡിയോയാണ് ആര്യ ഇൻസ്റ്റഗ്രാം സ്റ്റോറിയായി സോഷ്യൽ മീഡിയയിലൂടെ പങ്കുവച്ചിരിക്കുന്നത്. തന്നെ തേടി വന്ന ഫോണ്‍ കോളാണിതെന്നാണ് ആര്യ പോസ്റ്റിലൂടെ പറയുന്നത്.
‘ ഞങ്ങളുടെ ഒഫീഷ്യല്‍ നമ്പറിലേക്ക് വിളിച്ചു (കമ്പനി നമ്പര്‍). ഞാനുമായി ഒരു പ്രൊജക്ട് ചര്‍ച്ച ചെയ്യണം എന്നു ആവശ്യപ്പെട്ടുകൊണ്ടാണ് എന്നെ വിളിച്ചത്. പെട്ടെന്ന് തന്നെ വിഷയം മൊത്തം വഴി മാറിപ്പോയിരുന്നു. ബാക്കി ചരിത്രമാണ്’ എന്നാണ് വിഡിയോയ്ക്കൊപ്പം താരം സോഷ്യൽ മീഡിയയിൽ കുറിച്ചത്.
വിഡിയോയില്‍ ഫോണ്‍ വിളിച്ച പുരുഷന്‍ ആര്യയുടെ സ്ഥാപനത്തിലെ യുവതിയുമായി സംസാരിക്കുന്നതാണ് കൊടുത്തത്. യുവാവ് പലപ്പോഴും അശ്ലീലമായി പല കാര്യങ്ങളും ചോദിക്കുന്നുണ്ട്. ഫോണ്‍ വിളിച്ചയാളുടെ നമ്പര്‍ അടക്കം വ്യക്തമാകുന്ന രീതിയിലാണ് ആര്യ വിഡിയോ പങ്കുവെച്ചത്.
