Editor 3
ജീവിതത്തില്‍ പത്രപ്രവര്‍ത്തകയാവാന്‍ ആഗ്രഹിച്ച ആളായിരുന്നു താനെന്ന് ലക്ഷ്മി നായര്‍ പറയുന്നു. ദൂരദര്‍ശനില്‍ ഒരുവര്‍ഷത്തോളം വാര്‍ത്ത വായിച്ചിരുന്നു. വിവാഹത്തോടെയായാണ് ബ്രേക്കെടുത്തത്. 22ാമത്തെ വയസിലായിരുന്നു വിവാഹം.
വിവാഹശേഷവും പഠിച്ചിരുന്നു. പലരും പ്രണയവിവാഹമാണെന്ന് കരുതുന്നുണ്ടെങ്കിലും ഞങ്ങളുടേത് പക്കാ അറേഞ്ച്ഡ് വിവാഹമാണെന്ന് അവര്‍ പറയുന്നു. ഫ്‌ളവേഴ്‌സ് ഒരുകോടിയില്‍ പങ്കെടുക്കാനെത്തിയപ്പോഴായിരുന്നു ലക്ഷ്മി നായര്‍ ജീവിത വിശേഷങ്ങള്‍ പങ്കുവെച്ചത്.
അച്ഛന്‍ നല്ല കാര്‍ക്കശ്യമുള്ളയാളായിരുന്നു. എനിക്ക് രണ്ട് സഹോദരന്‍മാരാണ്. യാദൃശ്ചികമായാണ് കുക്കിംഗില്‍ കൂടുതല്‍ താല്‍പര്യം വന്നത്. സ്വന്തമായൊരു കാറ്ററിംഗ് യൂണിറ്റ് തുടങ്ങിയിട്ട് 25 വര്‍ഷമായി. അച്ഛനൊന്നും അറിയാതെയാണ് അത് തുടങ്ങിയത്.
അമ്മൂമ്മ നന്നായിട്ട് പാചകം ചെയ്യും. ഇതെല്ലാം കാണാനും കേള്‍ക്കാനുമൊക്കെയായി ഞാനും അവരുടെ കൂടെയുണ്ടാവാറുണ്ട്. എപ്പോഴും അടുക്കള പരിസരത്ത് തന്നെയുണ്ടാവാറുണ്ട്. ആഹാരം വിളമ്പിക്കൊടുക്കാനും ഏറെയിഷ്ടമുള്ള കാര്യമാണ്.
ചെറുക്കനും വീട്ടുകാരും വന്നപ്പോള്‍ അവര്‍ക്ക് കൊടുത്ത പലഹാരങ്ങളെല്ലാം ഞാനായിരുന്നു ഉണ്ടാക്കിയത്. അതറിഞ്ഞപ്പോള്‍ എല്ലാവര്‍ക്കും സന്തോഷമായിരുന്നു. നന്നായി ഇംഗ്ലീഷ് സംസാരിക്കുന്നയാളായിരിക്കണം ഭര്‍ത്താവ് എന്നുണ്ടായിരുന്നു. അദ്ദേഹം നന്നായി സംസാരിക്കുകയും ചെയ്യും.
പൊതുവെ പ്രൈവസി ഇഷ്ടപ്പെടുന്നയാളാണ് അദ്ദേഹം. അതാണ് വീഡിയോകളിലേക്കൊന്നും വരാത്തത്. അധികം യാത്ര ചെയ്യുന്നതും അദ്ദേഹത്തിന് ഇഷ്ടമല്ല. എന്നാല്‍ എനിക്ക് യാത്ര ചെയ്യാനുള്ള സ്വാതന്ത്ര്യമുണ്ട്. തന്റെ പേരിലൊരു അമ്പലമുള്ളതിനെക്കുറിച്ചും ലക്ഷ്മി നായര്‍ പറഞ്ഞിരുന്നു. മുനിയാണ്ടി എന്നൊരു പുള്ളിക്കാരനാണ് അതിന്റെ പിന്നില്‍.
അദ്ദേഹം ഇടയ്‌ക്കൊക്കെ വിളിക്കാറുണ്ട്. എന്റെ പിറന്നാളിന് അവിടെ സ്‌പെഷല്‍ പൂജയൊക്കെ നടത്താറുണ്ട്. അമ്പലം പണിതിട്ട് വര്‍ഷങ്ങളായി, ഇതുവരെ എനിക്കത് കാണാനായിട്ടില്ല. എപ്പോഴെങ്കിലും പോയി കാണണമെന്ന് ആഗ്രഹിക്കുന്നുണ്ട്. സൗന്ദര്യ സംരക്ഷണത്തിനായി അങ്ങനെ പ്രത്യേകിച്ചൊന്നും ചെയ്യാറില്ല. അടുത്തിടെ കൊച്ചുമകള്‍ക്കൊപ്പമുള്ള ചിത്രങ്ങള്‍ കണ്ട് എന്റെ മക്കളാണോയെന്ന് ചോദിച്ചിരുന്നു.
ലക്ഷ്മി നായര്‍ പ്രസവിച്ചുവെന്ന തരത്തിലായിരുന്നു ചിലര്‍ വാര്‍ത്ത കൊടുത്തത്. മകള്‍ക്ക് ഒറ്റപ്രസവത്തില്‍ മൂന്ന് കുട്ടികളാണ്. കുട്ടികള്‍ ജനിച്ചതിന് ശേഷം ഇടയ്ക്കിടയ്ക്ക് അവിടേക്ക് പോയിരുന്നു. വീഡിയോകള്‍ കാണുമ്പോള്‍ ഭര്‍ത്താവ് എവിടെ എന്ന് ചിലരൊക്കെ ചോദിക്കാറുണ്ട്. ചോദ്യങ്ങള്‍ കൂടിയപ്പോഴാണ് ഒരു വീഡിയോയില്‍ അദ്ദേഹത്തെക്കുറിച്ച് പറഞ്ഞത്.
സോഷ്യല്‍മീഡിയയിലെ വിമര്‍ശനങ്ങളിലൊന്നും തളരുന്നയാളല്ല. അപ്രതീക്ഷിതമായ ചില പ്രതിസന്ധികളെ നേരിട്ടപ്പോഴും തളര്‍ച്ചയുണ്ടായിരുന്നില്ല. സങ്കടമൊക്കെ വരാറുണ്ട്. എന്നാലും വളരെ കരുത്തയായ വ്യക്തിയാണ് താനെന്നും ലക്ഷ്മി നായര്‍ പറഞ്ഞിരുന്നു. യാത്രകള്‍ ചെയ്യുന്നതിനിടയിലുണ്ടായ രസകരമായ അനുഭവങ്ങളും ലക്ഷ്മി നായര്‍ പങ്കുവെച്ചിരുന്നു.
