മദ്യം ലഹരിയാണ് പക്ഷെ മദ്യം എവിടെയും നിരോധിച്ചിട്ടില്ല. സിനിമ ലൊക്കേഷനുകളിലെ ലഹരി ഉപയോഗം മറ്റുള്ളവർക്ക് ശല്യമാകുന്നുണ്ടെങ്കിൽ നിയന്ത്രിക്കണം.- നിഖില വിമൽ

പലപ്പോഴും സിനിമ താരങ്ങൾ സോഷ്യൽ മീഡിയയിലൂടെ നടത്തുന്ന പ്രസ്താവനകളെല്ലാം വിവാദങ്ങളായി മാറാറുണ്ട്. അത്തരത്തിൽ നടി നിഖില വിമൽ പറഞ്ഞ കാര്യമാണ് സോഷ്യൽ മീഡിയയിൽ വൈറലായിക്കൊണ്ടിരിക്കുന്നത്. സിനിമാ ലൊക്കേഷനുകളിൽ ഷാഡോ പൊലീസ് പരിശോധന നടത്തുന്നതിൽ തെറ്റില്ലെന്ന് പറയുകയാണ് നിഖിലാ വിമൽ. കണ്ണൂർ പ്രസ് ക്ളബിൽ ജേർണലിസ്റ്റ് വോളി ലീഗിന്റെ തീം സോങ് പ്രകാശത്തിനിടെ മാധ്യമങ്ങളുമായി സംസാരിക്കവെയാണ് നിഖിലയുടെ പരാമർശം.

ഇത്തരം കാര്യങ്ങൾ എല്ലാം ഫെഫ്ക പോലുള്ള സംഘടനകളാണ് തീരുമാനിക്കേണ്ടത് എന്നാണ് നിഖില പറയുന്നത്. മദ്യം ലഹരിയാണ് പക്ഷെ മദ്യം എവിടെയും നിരോധിച്ചിട്ടില്ല. സിനിമ ലൊക്കേഷനുകളിലെ ലഹരി ഉപയോഗം മറ്റുള്ളവർക്ക് ശല്യമാകുന്നുണ്ടെങ്കിൽ നിയന്ത്രിക്കണം. അതോടൊപ്പം മദ്യവും മയക്കുമരുന്നും ഉപയോഗിക്കുന്നത് ഓരോരുത്തരുടെയും ചോയ്‌സാണ്. എന്നാൽ ലഹരി ഉപയോഗിക്കുന്നതുമായി ബന്ധപ്പെട്ട പ്രശ്‌നങ്ങൾ താൻ അഭിനയിച്ച സിനിമകളുടെ ലൊക്കേഷനുകളിൽ ഉണ്ടായിട്ടില്ല. അത്തരം അനുഭവങ്ങൾ ഒന്നും തന്നെ തനിക്കുണ്ടായിട്ടില്ല- നിഖില പറഞ്ഞു.

മുൻപ് ഒരു സംവാദത്തിൽ താൻ പറഞ്ഞ കാര്യങ്ങൾ അടർത്തിയെടുത്ത് അതിനെ വളച്ചൊടിച്ച് മാധ്യമങ്ങൾ തനിക്കെതിരെ പ്രചരിപ്പിച്ചുവെന്നും നിഖില വെളിപ്പെടുത്തിയിരുന്നു. പ്രത്യേക മതവിഭാഗത്തിലെ സ്ത്രീകളെക്കുറിച്ച് താൻ ഒന്നും പറഞ്ഞിട്ടില്ലെന്നും ഓരോ നാടിന്റെയും പ്രത്യേകതകളെക്കുറിച്ചു സംസാരിക്കുകയായിരുന്നു. എന്നാൽ ഇത് മാത്രം അടർത്തിയെടുത്ത് വെറുതെ വിവാദങ്ങൾ സൃഷ്ടിച്ചത് മാധ്യമങ്ങളാണ്. സന്ദർഭത്തിൽ നിന്നും അത് മാത്രം അടർത്തിയെടുത്തുകൊണ്ട് എല്ലാവരും പ്രചരിപ്പിച്ചു. എന്നാൽ ഈ കാര്യത്തിൽ തന്റെ പ്രതികരണം ആരും ചോദിച്ചിട്ടില്ല. അതിനാൽ തന്നെയും ഇതിനെ തുടർന്ന് സമൂഹ മാധ്യമങ്ങളിലുണ്ടായ വിവാദങ്ങളിൽ തനിക്ക് ഉത്തരവാദിത്വമില്ല. സമൂഹത്തിൽ എന്തെങ്കിലും പ്രശ്‌നമുണ്ടെങ്കിൽ അത് പരിഹരിക്കേണ്ടത് മാധ്യമങ്ങൾ തന്നെയാണ്. ഈ വിഷയത്തിൽ താൻ ആരോടും പ്രതികരിച്ചിട്ടില്ല- നിഖില പറഞ്ഞു.