Editor 3 
2014 – 15 ഘട്ടങ്ങളില്‍ മലയാള സീരിയലില്‍ പെട്ടന്ന് ഉദിച്ച് വന്ന നായികയായിരുന്നു പ്രേമി വിശ്വനാഥ്. കാര്‍മുകിലിന്റെ അഴകുമായി എത്തി നായികാ സങ്കല്‍പങ്ങളെ തന്നെ തിരുത്തി എഴുതിയ പ്രേമി ആ കാലഘട്ടത്തില്‍ മലയാള ടെലിവിഷന്‍ ചര്‍ച്ചകളില്‍ പ്രധാന വിഷയമായിരുന്നു.
അന്ന് അല്പം പരിഹസിച്ചുകൊണ്ടുള്ള സോഷ്യല്‍ മീഡിയ ചര്‍ച്ചകളോട് ശക്തമായി പ്രേമി പ്രതികരിച്ചിട്ടുണ്ട്. ഇന്നും പ്രേമി നായികാ സങ്കല്‍പങ്ങളെ തിരുത്തിക്കുറിച്ച മുന്‍നിര നായിക തന്നെയാണ്, പക്ഷെ ഇങ്ങ് മലയാളത്തിലല്ല, അങ്ങ് തെലുങ്ക് ദേശത്ത്.
കറുത്ത മുത്ത് എന്ന സീരിയലില്‍ നിന്നും മനപൂര്‍വ്വം ഒഴിവാക്കപ്പെട്ട നടിയുടെ ഇപ്പോഴത്തെ ജീവിതം അറിയാം. ഏഷ്യനെറ്റില്‍ സംപ്രേക്ഷണം ചെയ്തിരുന്ന കറുത്ത മുത്ത് എന്ന സീരിയലിലൂടെയാണ് പ്രേമി വിശ്വനാഥിന്റെ അരങ്ങേറ്റം.
നിറത്തിന്റെ പേരില്‍ അവഹേളിക്കപ്പെടുന്ന പെണ്‍കുട്ടിയുടെ കഥ പറഞ്ഞ സീരിയലിലൂടെ പെട്ടന്ന് തന്നെ നായികയും ഹിറ്റ് ആയി. പതിവ് നായിക സങ്കല്‍പങ്ങള്‍ക്ക് വിപരീതമായതിനാല്‍ തന്നെ സീരിയല്‍ കാണാത്തവരും പ്രേമി എന്ന പുതിയ നടിയെ കുറിച്ച് സംസാരിക്കാന്‍ തുടങ്ങി.
2015 കാലഘട്ടത്തിലെ പ്രധാന ചര്‍ച്ചയായിരുന്നു കറുത്ത മുത്തിന്റെ ‘തനിനിറം’ ശരിക്കും പ്രേമി കറുത്തിട്ട് തന്നെയാണോ, അതോ സീരിയലിന് വേണ്ടി വെളുപ്പിച്ചതാണോ എന്നായിരുന്നു സംശയം. അതിന്റെ പേരില്‍ സോഷ്യല്‍ മീഡിയയില്‍ ക്രൂശിക്കപ്പെട്ടപ്പോള്‍ ശക്തമായി പ്രേമി പ്രതികരിച്ചതും വാര്‍ത്തയായിരുന്നു.
കറുത്തമുത്തിന്റെ നിറത്തെ സംബന്ധിച്ച് അന്വേഷിക്കാന്‍ സിബിഐ യെ വിടണം എന്ന തരത്തില്‍ വരെ സീരിയല്‍ വിരോധികള്‍ സംസാരിച്ചു. പെട്ടന്ന് ആണ് കറുത്ത മുത്ത് എന്ന സീരിയലില്‍ നിന്നും പ്രേമി വിശ്വനാഥിനെ പുറത്താക്കി എന്ന വാര്‍ത്ത വന്നത്. പ്രേമി മനപൂര്‍വ്വം പിന്മാറിയതാണെന്നും, അല്ല പുറത്താക്കിയതാണ് എന്നും ഗോസിപ്പുകള്‍ വന്നു.
അതിനിടയില്‍ തന്നെ മനപൂര്‍വ്വം പുറത്താക്കിയതാണ് എന്ന് പറഞ്ഞ് പ്രേമി തന്നെ രംഗത്തെത്തി. പ്രേമിയ്ക്ക് പകരം പുതിയ കറുത്തമുത്ത് വന്നപ്പോള്‍ പ്രേക്ഷകര്‍ക്കും അത് പെട്ടന്ന് സ്വീകാര്യമായിരുന്നില്ല. ചായം തേച്ച പുതിയ കറുത്ത മുത്ത് പതിയെ റേറ്റിങില്‍ പിന്നോട്ട് പോയി.
എന്നാല്‍ തഴയപ്പെട്ടപ്പോള്‍ മടിച്ച് പിന്മാറുകയായിരുന്നില്ല പ്രേമി വിശ്വനാഥ്. അത് ഒരു ഊര്‍ജ്ജമാക്കി എടുത്തു. മൂന്ന് മണി എന്ന സീരിയലിലെ മയിലമ്മ എന്ന കഥാപാത്രത്തിലൂടെയായിരുന്നു പ്രേമിയുടെ രണ്ടാം വരവ്. തുടര്‍ന്ന് കായം കുളം കൊച്ചുണ്ണിയുടെ മകന്‍ എന്ന സീരിയലിലെ താമര എന്ന കഥാപാത്ര ചെയ്തു.
സീരിയല്‍ ലോകത്തെ ആക്ഷന്‍ ലേഡിയായി മാറുകയായിരുന്നു പ്രേമി. അതിനിടെ കത്തിരിക്ക വെണ്ടക്ക എന്ന തമിഴ് സിനിമയിലും പ്രേമി നായിയായി എത്തി. പതിയെ പ്രേമി തെലുങ്കിലേക്ക് ചുവടുമാറി. കറുത്ത മുത്ത് എന്ന സീരിയലിന്റെ റീമേക്ക് ആയ കാര്‍ത്തിക ദീപത്തിലൂടെയായിരുന്നു തെലുങ്കിലേക്കുള്ള അരങ്ങേറ്റം.
വളരെ പെട്ടന്നാണ് തെലുങ്ക് പ്രേക്ഷകര്‍ പ്രേമിയെ സ്വീകരിച്ചത്. കാര്‍ത്തിക ദീപം തെലുങ്ക് സീരിയല്‍ ലോകത്ത് റേറ്റിങില്‍ ഒന്നാം സ്ഥാനത്ത് എത്തിയതോടെ പ്രേമിയ്ക്കും തിരിഞ്ഞു നോക്കേണ്ടി വന്നിട്ടില്ല. തുടര്‍ച്ചയായി തെലുങ്ക് സീരിയലിന്റെ ഭാഗമായി മാറിയ പ്രേമി പച്ച മലയാളം പോലെ ഇപ്പോള്‍ തെലുങ്കും സംസാരിക്കും.
അതിനിടയില്‍ പ്രേമിയുടെ വിവാഹവും കഴിഞ്ഞു. 2018 ല്‍ ആയിരുന്നു വിനീത് ഭട്ട് എന്ന അസ്‌ട്രോളജറുമായുള്ള പ്രേമിയുടെ വിവാഹം. വിവാഹ ശേഷവും പ്രേമി അഭിനയ ലോകത്ത് സജീവമാണ്. തന്റെ വിജയത്തിന് ദൈവത്തോട് കടപ്പെട്ടിരിക്കുന്നത് പോലെ തന്നെ ശത്രുക്കളോടും കടപ്പെട്ടിരിയ്ക്കുന്നു എന്നാണ് പ്രേമി പറയുന്നത്. അവര്‍ തന്ന ഇകഴ്ത്തലുകാണ് മുന്നേട്ടോക്ക് പായാന്‍ പ്രേമിക്ക് ഊര്‍ജ്ജം നല്‍കിയതത്രെ.
