Editor 3 
സിനിമാ ലോകത്ത് കത്തിജ്ജ്വലിച്ച് നിൽക്കുകയും പിന്നീട് ആത്മീയ ലോകത്തേക്ക് തിരിയുകയും ചെയ്ത നിരവധി നടിമാരുണ്ട്. സൈറ വസീം, സന ഖാൻ തുടങ്ങിയ മുൻനിര നടിമാരുടെ പേരുകളൊക്കെ ഇതിനുദാഹരണമാണ്. ഈ രണ്ട് നടിമാർക്കുശേഷം ഇപ്പോൾ ഭോജ്പുരി നടി സഹർ അഫ്ഷയും ചേരുകയാണ്.
സഹർ അഫ്ഷ സിനിമാ ലോകം ഉപേക്ഷിച്ച് സ്വന്തം ലോകത്തേക്ക് ഒതുങ്ങിക്കൂടിയിരിക്കുന്നു. സോഷ്യൽ മീഡിയ പോസ്റ്റിലൂടെയാണ് സഹർ സിനിമാ ലോകം വിടുന്നതായി അറിയിച്ചിരിക്കുന്നത്. ഏതൊരു നടിയും അഭിനയ ലോകത്ത് എത്തുന്നത് പേര് സമ്പാദിക്കുവാനും പണം സമ്പാദിക്കാനുമാണ്.
അതിനായി അവർ കഠിനാധ്വാനം ചെയ്യുന്നു. അതേസമയം, പ്രശസ്തിയും സമ്പത്തും ലഭിക്കുമ്പോൾ അഭിനയം ഉപേക്ഷിക്കുന്ന പ്രവണതയും സിനിമാ ലോകത്തുണ്ട്. ഭോജ്പുരി സിനിമയിലെ പ്രശസ്ത നടി സഹർ അഫ്ഷയും സമാനമായ ഒരു ചുവടുവെപ്പ് നടത്തിയിരിക്കുകയാണ്.
ഇൻസ്റ്റഗ്രാം പോസ്റ്റിലൂടെയാണ് സഹർ ഈ വിവരം പങ്കുവെച്ചിരിക്കുന്നത്. താൻ സിനിമാ ലോകം ഉപേക്ഷിക്കുകയാണെന്നും ഇനി എനിക്ക് ഈ രംഗത്ത് ഒന്നും ചെയ്യാനില്ലെന്നും നടി ചൂണ്ടിക്കാണിച്ചിരിക്കുന്നു. സിനിമാ ലോകം വിട്ട് അള്ളാഹുവിനെ ആരാധിക്കാൻ തീരുമാനിച്ചിരിക്കുകയാണ് നടി.
‘ഇസ്‌ലാമിക വിദ്യാഭ്യാസത്തിനും അല്ലാഹുവിൻ്റെ അൽഹാമിനും അനുസരിച്ചുള്ള ജീവിതം നയിക്കാനാണ് ഞാൻ ഉദ്ദേശിക്കുന്നത്. ജീവിതത്തെ സംബന്ധിച്ചുള്ള എൻ്റെ ഉത്കണ്ഠ ഞാൻ ഉപേക്ഷിക്കുന്നു. ഞാൻ അല്ലാഹുവിനു മുന്നിൽ പശ്ചാത്തപിക്കുന്നു. ഞാൻ അല്ലാഹുവിനോട് പാപമോചനം തേടുകയാണ്´- നടി പറയുന്നു.
ഞാൻ യാദൃശ്ചികമായാണ് ഈ രംഗത്തേക്ക് വന്നത്. എന്നാൽ ഇപ്പോൾ എല്ലാം അവസാനിപ്പിക്കാൻ തീരുമാനിച്ചു. അടുത്ത ജീവിതം അല്ലാഹുവിന്റെ നാമത്തിലായിരിക്കും. ഗ്ലാമറസ് ജീവിതം ഉപേക്ഷിച്ച് ഇനി നടക്കാൻ പോകുന്നത് അള്ളാഹു കാണിച്ചു തന്ന വഴിയിലൂടെ മാത്രമാണെന്നും നടി പറയുന്നു.
സഹറിൻ്റെ തീരുമാനത്തിൽ സന്തോഷം പ്രകടിപ്പിച്ച് സന ഖാൻ രംഗത്തെത്തി. ഭോജ്പുരി സിനിമയിൽ സഹറിന് ശക്തമായ ആരാധകരുണ്ടായിരുന്നു. ഖേസരി ലാൽ യാദവ്, പവൻ സിംഗ് തുടങ്ങിയ എല്ലാ വലിയ താരങ്ങൾക്കൊപ്പവും സഹർ പ്രവർത്തിച്ചിട്ടുണ്ട്. സഹറിൻ്റെ ഈ തീരുമാനം അദ്ദേഹത്തിന്റെ ആരാധകർക്ക് വലിയ തിരിച്ചടിയാണ് നൽകുന്നതെന്ന് വ്യക്തം.
